至於較早開波嘅死亡F組賽事，將會上演兩支歐洲球隊對決，首輪和波嘅「橙衣軍團」荷蘭火併榜首瑞典。「橙軍」上仗對日本，兩度領先情況下，最終都被對手逼和，反映球隊雖然進攻對辦，但防守略嫌不足，至於瑞典踢法以攻代守，入得又失得，呢支北歐兵團近7仗6次開3球或以上，2.5球入球大乃不二之選。（Now 618及616周日凌晨1時直播）文:邪神

世盃「無冕之王」荷蘭，早年一直倚賴老將迪比數胡，主帥朗奴高文有見及此，今屆特意搵嚟唔同類型攻擊手，包括擅長內切射門嘅加普、突破力強嘅唐耶爾馬倫、超級後備韋格賀斯，仲有「哈索賓基傳人」森馬維，該韋斯咸射手上仗喺嚴密防守下，攻破日本大門。

頭重尾輕入波唔會少
當然「橙衣軍團」隊長華基爾雲迪積克（ＶＶＤ）亦係一大殺着，上仗就係憑呢位中堅頭槌先開紀錄，不過荷蘭後防唔夠穩固，上仗鬥日本，居然喺比賽末段輸高波，防線表現相當牙煙。

瑞典坐擁約基利斯及阿歷山大伊沙克兩大射手，上仗大炒突尼西亞5比1盡顯威力，眾將士氣高漲，不過瑞典防線欠缺大將坐鎮，陣容頭重尾輕，今仗雙方鬥攻之下，入球騷可期。